كنت متخيله انهم يكونوا عندهم حاجات يقدموه، اى حاجة، مشروع النهضة بقى والشاطر قاعد بيذاكر، وسلطة نفسهم يوصلوا ليها بقالهم 80 سنة، لكن لما وصلوا المستوى صدمنى !!!!!!!!!!!!!
الحاجة الوحيدة اللى اظهروا جميعاً كفاءة فيها الكذب والخداع و تزيف الحقائق ... على شوية كبرياء هنا ... وحبه انكار للواقع هناك .... يعنى خلطة مش بتجيب لقدام خالص.
مش هى دى المشكلة الأساسية، المشكلة الأساسية بقى انهم لما شرفونا على كرسى السلطة سابوا الظلم والفساد زى ماهو يرعى في كل شبر من أرض مصر.
الفقير في عهد سيادته مش مامن عيشه او امانه في الشارع او مستقبل اولاده.
القاتل اتكرم واتعين مستشار او وزير.
الفاسد بقى في الوزارة وفي مجلس الشورى
وكل لما يحصل مصيبة ويموت من المصريين كثير .. يطلعوا يقولوا مش احنا المسئولين، دى تركه النظام البائت.
والنتيجة صرخة المصرى صوتها اتسمع في كل شارع
صرخة اطفال اسيوط واهلهم
صرخة أم مصرية في جنازة شهيد
صرخة شباب هان عليهم الموت
صرخة بنات بتصرخ وتقول الشارع لينا.
صرخة كل مصرى بيطالب بالعدالة في الأجور بيطلب من سنين ولسه بيطلب انه يعرف يأكل ولاده ويعلمهم ويداويهم ويدفيهم ويكون مطمن على مستقبلهم، وانه يلاقى كرامه في بلده.
صرخة كل مصرى زهق ويأس
صرخة أهالى المفقودين.
صرخة واحد مصرى بيتعذب دلوقتى على يد ضابط مصرى في مكان ما في ارض مصر.
صرخة مريض مش لاقى علاج.
صرخة اهالى ضحية جديدة لجريمة جديد لنظام مصرى شبه النظام اللى قبله واللى هو كان شبه النظام اللى قبله
صرخة دم كل مصرى قُتل (شهيد بلطجى مجرم) مش فرقه هو مين، دم سفك على ارض مصر، دم يصرخ.
إن كان دم وإن كان مظلوم حى .. فالكل بيصرخ ,والله يسمع.
الله يسمع ... هو يمهل وهو يجازى.
اصرخ يا مصرى
في الشارع قدام المصرى اخوك
او قدام الكاميرا
اصرخى يا مصرية سمعى العالم كله صوتك
واصرخ واصرخى قدام الله، فالله يسمع
وهو يجازى وهو عادل وهو يمهل لكنه يجازى
اصرخ
ليست هناك تعليقات:
إرسال تعليق