ديه بنت فقيرة بتعيش في قرية مصرية ، مش مهم قوى اسمها او اسم قريتها ففي كل قرية فيه زى البنت ديه كثير
هى طفلة زى اى طفله نفسها تروح وتيجى وتلعب وتتعلم . بتحلم تبقى دكتورة او مهندسة او مدرسة لما تكبر
نفسها تجيب جلبية جديدية على العيد ، وبتفرح قوى بتوكة جديدة او عروسة بسيطة او اكله لذيذه او او حته حاجة حلوة او علبة الوان وكتاب تلون فيه.
البنت ديه اهلها بيتعبوا كثير علشان تتعلم هى واخواتها الولاد والبنات
ممكن يكون اهلها اباء صالحيين او لا- لكن الاكيد ان البنت ديه ضعيفه ومش بتمتلك القدرة على الدفاع عن نفسها اوتحقيق احلامها او مواجه ظلم والديها اذا ظلموها
ايه الافضل انه يتقدم ليها:
فرصة جيدة للتعليم تساعدها انها تقدر تحسن مستوى معيشتها لما تكبر وتشتغل - ام فرصة للزواج وهى لا تزال صغيره؟!
مساحة للعب والمذاكرة والنمو - ام مساحة وحمل من مسئولية بيت واسرة واطفال ؟!
مشروعات قوانيين تساعد في تحسين احوال الفقراء - ام مشروعات قوانيين تعطى الاب الحق في تزويج البنت ديه في سن اقل من 18 سنة؟!
نوفر لها بيت مناسب فيه مياه نظيفة وكهرباء وصرف صحى تعيش فيه مرتاحه - ولا نوفرها بيت الزوجيه الراجل الغنى اللى هينقذها هى وعيلتها من الفقر - بس مش مهم الثمن اللى هى هتدفعه؟؟
اعطيها الفرصة لبلوغها نفسيا وعقلياً واجتماعياً - ولا البلوغ الجسدى يكفى ويزيد
جدتى تزوجت منذ 65 سنة وكان عندها 13 سنة - ومعنديش مانع انى اسمع حكايات زى ديه من 100 سنة او من 1600 ده كان طبيعى. اللى مش طبيعى انه بعد ما العلم قال انها جسدياً مضر ليها تحمل تبعات ان تحبل وتلد وتربى اطفال - او انها إذا وصلت للنضوج الجنسى لكن لسه جسدها ونفسها وعقلها لم ينضجوا بعد ولا زالت العملية مستمرة - الاقى حد بيفكر انه لانه حصل من 1600 سنة فيحصل النهاردة كمان، ليه؟
وليه الولد بالقانون يتزوج عند 18 سنة والبنت نفكر في سن اقل من كده - مع إن البنت زى الولد محتاجه تكمل تعليمها وهى محتاجة اكثر من الولد انها تكمل نموها الجسمانى لتحمل تكلفة الحمل والولادة ورضاعة الصغير، لصحتها ولصحة اطفالها كمان.
البنت اللى في الصورة احتمال يكون ابوها بيضغط على امها او العكس او انهم الاثنينين متفقين انهم يخرجوها هى واخوها من المدرسة علشان العيشة بقيت مره الولد يساعد ابوه وهى تساعد امها في البت.
احتمال ان اهلها يكونوا مش مقتنعين باهمية التعليم - يعنى اللى اتعلموا عملوا ايه - ويخلوها تتجوز احسن.
واحتمال ابوها وامها يكونا مصريين انهم يخلوا اولادهم يكملوا تعليمهم علشان يعيشوا عيشه كويسه لما يكبروا
احتمال يكون ابوها صالح مش ممكن يفكر يبيع بنته لراجل غنى وكبير مقابل الفلوس
واحتمال يكون اب مش كويس
واحتمال انه يكون اب محتاج من نوعية الناس (الغلبانة المطحونة المذلوله) اللى بتبيع اجزاء من جسمها نتيجة لاحتياجهم للفلوس.
مش كل الاباء صالحين لكن كل الاطفال ضعفاء غير قادرين على دفع ظلم الاباء (او ظلم المجتمع) متى وقع عليهم.
علشان كده القوانيين اللى نفسى اشوفها قوانيين بتحمى حقوق الاطفال وبتمكنهم انهم يعيشوا حياة معقولة. بتأكد على فرصتهم في التعليم
ابذل مجهود
انك تشجع طفل فقير وتقوله انه كويس وانه جدع او انه ذكى، علشان اهله مش فاضين ومش رايقيين يقولوه او يشجعوه.
وطبطب على كتف اب او ام فقيره علشان الحمل تقيل عليهم.
