الثورة مش بسر غيرتنى - الثورة بتغيرنى كل يوم مع كل خبر وكل حدث وكل هتاف
اهم حاجة عملتها ثورة يوم 25 يناير جوايا إنها فتحت عنيى على مصر الحلوة، شوفت في يوم 25 يناير اللى كنت مستنيه اشوفه من زمان، شوفت شعب جميل نزل الميدان، نزل الميادين.
شوفت الحلاوة اللى كان الاعلام بيخبيها ويصدر لينا اوحش ما فيكى يا مصر، لغاية ما زهقنا وصدقنا ان مفيش فيك حاجة حلوة وكنا عايزين نسافر ونسيبك - يوم 25 يناير انا تخليت عن فكره الهجرة - وحبيت مصرقبل 25 يناير كنت باشفق على الشعب المصرى الفقير الجاهل - بعد احداث الثورة حبيت مصر وفهمت يعنى ايه مصر بلد حضارة واحترمت المصريين واترفعت لانى واحدة منهم.
قبل 25 يناير كنت حاسه انى مواطنه مسيحية ماشية على جنب وكان اقصى اللى بحلم بيه انى تتعامل بطريقة كويسه في الشارع ويكون فيه عدل شوية - دلوقتى انا حاسه انى مواطنه درجة اولى وحقوقى مش تفضلاً من اصحاب البلد المسلمين - لا دى حقوقى اللى بيفرضها كونى بنت البلد دى
الثورة خليتنى افهم معنى الكرامة والعزة - الكنيسة علمتنى المسامحة والغفران والحكمة والصبر - الثورة علمتنى مجموعة من القيم الجديدة
الثورة اقنعتنى انى مش بس مصرية لكن عربية وصالحتنى على العرب - ولقيت انه فيه حاجات كثير مشتركه بينا مش بس الدين الاسلامى
انا مواطنه مصرية مسيحيية
مواطنة درجة اولى :)
مواطنة درجة اولى :)
ليست هناك تعليقات:
إرسال تعليق